लन्डन, ३ भदौ । रूसमा भएको पछिल्लो युक्रेनी आक्रमणमा बेलायतमा निर्मित ड्रोन प्रयोग भएको पुष्टि भएपछि रूसले दिएको चेतावनीलाई बेवास्ता गर्दै बेलायतले युक्रेनलाई पूर्ण सहयोग जारी राख्ने प्रतिबद्धता व्यक्त गरेको छ।
बेलायती प्रधानमन्त्री एन्डी बर्नह्यामले विज्ञप्ति जारी गर्दै युक्रेनलाई आवश्यक परेका बेला आफ्नो मुलुक सधैं साथमा रहने बताएका छन्। युक्रेनलाई निरन्तर सैन्य सहयोग दिँदा रूसबाट उत्पन्न हुन सक्ने जोखिमबारे सोधिएको प्रश्नमा उनले बेलायतले युक्रेनलाई आत्मरक्षाका लागि चाहिने सहयोग उपलब्ध गराउँदै आएको र आगामी दिनमा पनि त्यसलाई निरन्तरता दिने जवाफ दिएका छन्।
यसैबीच, लन्डनस्थित रूसी दूतावासले बेलायतले जानाजानी युक्रेन सङ्कट चर्काउने नीति लिएको आरोप लगाएको छ। दूतावासका अनुसार बेलायतले द्वन्द्वमा आफ्नो संलग्नता कायम राखे त्यसको उच्च मूल्य चुकाउनुपर्नेछ। त्यस्तो अवस्थामा बेलायतले त्यसको परिणाम भोग्नुपर्ने चेतावनी पनि दिइएको छ।
युक्रेनले पछिल्लो समय मस्कोसहित रूसका विभिन्न क्षेत्रमा लामो दूरीका ड्रोन आक्रमण तीव्र पारेको छ। आक्रमणमा रूसका तेल प्रशोधन केन्द्र तथा रूसकै प्रमुख अनलाइन खुद्रा विक्रेता वाइल्डबेरीजसँग सम्बन्धित गोदामलाई समेत निशाना बनाइएको छ।
