धरानस्थित बीपी कोइराला स्वास्थ्य विज्ञान प्रतिष्ठान (BPKIHS) मा रेजिस्ट्रार, अस्पताल निर्देशक र रेक्टर गरी तीन प्रमुख पदका लागि ३३ आवेदन परेका छन्।
तीन पदमध्ये रेजिस्ट्रारका लागि सबैभन्दा धेरै १७ जनाले आवेदन दिएका छन्। अस्पताल निर्देशक पदमा १२ र रेक्टर पदमा चार जनाले आवेदन दिएका छन्। कतिपय आवेदकले एकभन्दा बढी पदमा आवेदन दिएकाले कुल आवेदकहरूको सङ्ख्या ३० छ।
डा. अरुण कुमार सिंह र डा. दबल बहादुर धामीले रेजिस्ट्रार र अस्पताल निर्देशक दुवै पदका लागि आवेदन दिएका छन्। प्रा. डा. काजीराम अधिकारीले भने रेजिस्ट्रार र रेक्टर दुवै पदमा आवेदन दिएका छन्।
उपकुलपति प्रा. डा. स्मृति कार्की नियुक्त भएपछि रिक्त रहेका यी पदहरूको छनोट प्रतिष्ठानको पदाधिकारी छनोट तथा सिफारिस कार्यविधि, २०८३ अनुसार हुनेछ। सो कार्यविधिअनुसार उपकुलपति प्रमुख रहने सिफारिस समितिले छनोट प्रक्रिया अघि बढाउनेछ। प्रतिष्ठानले प्रारम्भिक मूल्याङ्कनपछि शर्टलिस्ट प्रकाशन गर्ने तयारी गरेको छ। सिफारिस समितिले शर्टलिस्ट भएकाहरूको मूल्याङ्कन गरी नियुक्तिका लागि सिफारिस गर्नेछ।
रेजिस्ट्रार पदका आवेदकहरूमा डा. अरुण कुमार सिंह, रमेश कुमार यादव, डा. विपेश आचार्य, मदन कुमार साह, प्रा. डा. अशोक कुमार झा, कमल कुमार राई, जितेन्द्र कुमार यादव, डा. दबल बहादुर धामी, धरणीधर बराल, प्रा. डा. काजीराम अधिकारी, रूपा सिंहान्ची, विनोद कुमार यादव, प्रदीप शाक्य, प्रा. डा. शमशेर श्रेष्ठ, सागर कुमार ताम्रकार, डा. इन्द्र मोहन झा र डा. किशुन देव मेहता छन्।
अस्पताल निर्देशक पदका लागि डा. अरुण कुमार सिंह, डा. जितेन्द्र शाह, डा. रितेश चौधरी, डा. दबल बहादुर धामी, प्रा. डा. अशोक कुमार यादव, डा. इन्द्र कुमार लिम्बू, दीपक कुमार यादव, डा. सेराज अहमद खान, डा. जगत नारायण प्रसाद, डा. विम्मी सिंह, डा. मधुर बस्नेत र डा. विवेक कट्टेल गरी १२ जनाले आवेदन दिएका छन्।
रेक्टरका लागि प्रा. डा. काजीराम अधिकारी, प्रा. डा. रोबिन मास्के, प्रा. डा. कृष्ण पोखरेल र प्रा. डा. शिवेन्द्र झा गरी चार जनाको आवेदन परेको छ।
