१० भदौ, काठमाडौं । रसुवाको भोटेकोशीमा आएको बाढीबाट प्रभावित क्षेत्रमा भइरहेको खोजीका क्रममा हालसम्म सात जनाको शव भेटिएको छ। बागमती प्रदेश प्रहरी प्रमुख दीपक रेग्मीले दिएको जानकारीअनुसार नुवाकोट र धादिङका नदी किनारमा ती शव फेला परेका हुन्।
रेग्मीका अनुसार नुवाकोटको नदी किनारमा तीन जनाको शव फेला परेको छ भने धादिङमा चार जनाको शव भेटिएको छ। उनले बाढीमा घाइते भएकाहरूको उद्धार तथा फेला परेका शव संकलनको काम भइरहेको बताए।
बाढीमा परी केही मानिस बेपत्ता भएको सूचना आइरहेको र उनीहरूको खोजीकार्य पनि जारी रहेको प्रहरी प्रमुख रेग्मीले जानकारी दिए। उद्धार र खोजीका लागि आवश्यक टोली परिचालन गरिएको उनले बताए।
