रसुवाको भोटेकोशी नदीमा आएको बाढीपछि हालसम्म सम्पर्कमा नआएका प्रहरी कर्मचारीको खोजी कार्यलाई प्रभावकारी बनाउन नेपाल प्रहरीले सम्पर्क अधिकृत खटाएको छ। उनीहरूका परिवारका सदस्यलाई आवश्यक सूचना दिन र खोजीका क्रममा समन्वय गर्न पनि ती अधिकृतहरूलाई जिम्मेवारी तोकिएको प्रहरी प्रधान कार्यालयले जनाएको छ।
प्रहरी प्रधान कार्यालयले आज (१० भदौ) विज्ञप्ति जारी गर्दै चीनको तिब्बततर्फबाट आएको आकस्मिक बाढीले रसुवाको बेत्रावती, टिमुरे, स्याफ्रुबेँसी र सीमावर्ती क्षेत्रमा क्षति पुर्याएको जनाएको छ। सो क्रममा टिमुरेस्थित इलाका प्रहरी कार्यालय र अन्य पोस्टमा कार्यरत केही प्रहरी कर्मचारी सम्पर्कविहीन भएका हुन्।
बेपत्ता भएकाहरूको अवस्था पत्ता लगाउन तथा परिवारजनलाई सूचित गर्न प्रहरी वरिष्ठ उपरीक्षक सन्तोषकुमार भट्टराई, प्रहरी नायब उपरीक्षक ईश्वरीप्रसाद भण्डारी, प्रहरी निरीक्षक चुडाकुमारी खड्का, प्रकाश थापा, राजेश बस्नेत र प्रहरी सहायक निरीक्षक ज्ञानेन्द्र कोइरालालाई सम्पर्क अधिकृतको जिम्मेवारी दिइएको छ।
सञ्चार सेवा अवरुद्ध हुनु र क्षेत्रको भौगोलिक विकटताले खोजीमा कठिनाइ उत्पन्न भएको छ। नेपाली सेना, सशस्त्र प्रहरी बल र नेपाल प्रहरीका टोलीले घटनास्थलमा खोजी तथा उद्धार जारी राखेका छन्। हेलिकप्टर र ड्रोनको सहायताले प्रभावित क्षेत्रमा उद्धारको काम अघि बढाइएको छ।
प्रहरी बुलेटिनका अनुसार अहिलेसम्म २८ जना प्रहरी कर्मचारी सम्पर्कमा आउन सकेका छैनन्।
