भोटेकोशी बाढीको विध्वंस झन् व्यापक हुँदै गएको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणको पछिल्लो विवरणअनुसार अहिलेसम्म आठ जिल्लाबाट सात सय ३४ शव भेटिएका छन् भने दुई हजार चार सय ९८ जना बेपत्ता छन्।
शव भेटिएका जिल्लामध्ये चितवनमा सबैभन्दा धेरै दुई सय ५९ शव छन्। यस्तै नवलपरासी पूर्वमा एक सय ८४, नवलपरासी पश्चिममा ८२, गोरखामा ५८, नुवाकोटमा ५२, धादिङमा ५०, तनहुँमा ३६ र रसुवामा १३ शव फेला परेका छन्।
बेपत्ता हुनेहरूमा जलविद्युत् आयोजनाका ९३३ कामदार, रसुवाका ५६२ र नुवाकोटका ११५ जना छन्। नेपाल प्रहरीका २७, नेपाली सेनाका ४५, सशस्त्र प्रहरी बलका १३ जना पनि बेपत्ता सूचीमा छन्। भन्सारका १५ र अध्यागमनका चार कर्मचारी पनि सम्पर्कविहीन छन्।
विदेशी नागरिकमध्ये ५८९ जना बेपत्ता रहेका छन्। विदेशी पर्यटकसँगै यात्रा गरेका १२७ नेपाली पनि बेपत्ता छन्। लाङटाङ राष्ट्रिय निकुञ्जसँग आबद्ध तीन जना पनि बेपत्ता सूचीमा छन्।
उद्धार कार्यबाट हालसम्म आठ हजार एक सय ८६ जनालाई सुरक्षित स्थानमा पुर्याइएको छ। नेपाली सेनाले दुई हजार नौ सय ७४, नेपाल प्रहरीले दुई हजार छ सय ९९ र सशस्त्र प्रहरी बलले दुई हजार पाँच सय १३ जनाको उद्धार गरेका छन्। जलविद्युत् सुरुङभित्र फसेका दुई सय ७९ जनालाई दुई दिनमा हवाई मार्गबाट उद्धार गरिएको छ भने दुई सय २७ विदेशी नागरिकलाई निकासी गरिएको छ।
यो विपद्मा दुई सय ४२ जना घाइते भएका छन्। प्रभावित क्षेत्रमा शल्यक्रिया टोली परिचालन गरिएको छ । विभिन्न जिल्लाका २१ अस्पतालमा अहिलेसम्म सनाखत नभएका शवहरू राखिएका छन्।
सरकारले रसुवा र नुवाकोटका लागि रु एक–एक अर्ब, धादिङका लागि रु ५० करोड छुट्याएको छ। बाढी प्रभावित १५ स्थानीय तहका लागि रु ६७ करोड ५० लाख राहत रकम विनियोजन गरिएको छ। राहत सामग्री लिएर ३७ ट्रक खटाइएको छ भने सात हेलिकप्टर उडान भएका छन्। उत्तरगया र धुन्चेमा दुई टन खाद्यान्न पठाइएको छ र सञ्चार उपकरण पनि परिचालन गरिएको छ।
