सोमबार देशभर मनसुनी वर्षा र चट्याङको सम्भावना रहेको छ। कोशी र बागमती प्रदेशका केही भागमा भने अत्यधिक भारी वर्षा हुन सक्ने मौसम पूर्वानुमान महाशाखाले जनाएको छ।
महाशाखाका अनुसार सोमबार देशभर सामान्य बदली रहनेछ। हिमाली तथा पहाडी क्षेत्रका धेरै स्थानमा मध्यम वर्षासँगै चट्याङ र बिजुली चम्किने सम्भावना छ। बागमती, गण्डकी, लुम्बिनी र सुदूरपश्चिम प्रदेशका तराई क्षेत्रका धेरै स्थान तथा मधेश प्रदेश र कोशी प्रदेशको तराईका केही स्थानमा पनि चट्याङसहित मध्यम वर्षा हुनसक्ने पूर्वानुमान छ।
देशभरका पहाडी क्षेत्रका एक–दुई स्थानमा भारी वर्षाको सम्भावना छ। बागमती, गण्डकी, लुम्बिनी र सुदूरपश्चिम प्रदेशका तराई क्षेत्रमा पनि भारी वर्षा हुनसक्ने महाशाखाले बताएको छ।
रातिमै अवस्था थप गम्भीर हुनसक्ने पूर्वानुमान छ। कोशी, बागमती र गण्डकी प्रदेशका हिमाली, पहाडी तथा तराई क्षेत्र र लुम्बिनी प्रदेशका पहाडी भागमा भारी वर्षा हुने सम्भावना छ। त्यस्तै, कोशी र बागमती प्रदेशका हिमाली तथा पहाडी भागका एक–दुई स्थानमा अत्यधिक भारी वर्षा हुनसक्ने महाशाखाको भनाइ छ।
हाल देशभर मनसुनी वायुको प्रभाव रहेको छ भने मनसुनको न्यून चापीय रेखा सामान्य अवस्थाभन्दा केही उत्तरतिर रहेको महाशाखाले जनाएको छ।
महाशाखाले सार्वजनिक गरेको विभिन्न सहरको पूर्वानुमानअनुसार सिमरामा अधिकतम ३५ देखि ३७ डिग्री सेल्सियस तापक्रम पुग्ने छ, जुन सबैभन्दा बढी हो। भैरहवा र जनकपुरमा ३४ देखि ३६ डिग्री, काठमाडौंमा २८ देखि ३० डिग्री र पोखरामा ३१ देखि ३३ डिग्री तापक्रम रहने अनुमान छ। काठमाडौं र पोखरामा वर्षाको सम्भावना ६० प्रतिशत रहेको महाशाखाले बताएको छ।
जोमसोम भने सबैभन्दा चिसो रहने छ, जहाँ अधिकतम २२ देखि २४ डिग्री र न्यूनतम १५ देखि १७ डिग्री तापक्रम रहने पूर्वानुमान छ। धरानमा भने ३३ देखि ३५ डिग्री तापक्रम रहने जनाइएको छ, जुन दिन र रातको लागि लगभग समान रहने उल्लेख छ।
