संघीय संसद्को अधिवेशन अन्त्यको तयारी, असोज १५ सम्मको कार्यसूची सार्वजनिक

काठमाडौं । संघीय संसद्को चालू अधिवेशन अन्त्यतिर पुर्‍याउने तयारी सरकारले थालेको छ । आगामी असोज १५ गतेसम्म प्रतिनिधिसभाको बैठकमा कुन विषय पेस हुने भन्ने सम्भावित कार्यसूची समेटिएको संसदीय क्यालेन्डर सार्वजनिक भइसकेको छ । यही क्यालेन्डरपछि थप एक वा दुई बैठक मात्र राखेर अधिवेशन अन्त्य गर्ने सरकारको रणनीति छ ।

रास्वपाका एक नेताका अनुसार असोज १६ गते प्रतिनिधिसभाको बैठक बोलाइएको छ, जसमा अधिवेशनभर भएका कामकारबाहीबारे जानकारी गराउने विषयमा छलफल भएको छ । असोज १५ यतापछि बढीमा एक वा दुई बैठक बस्न सक्ने उनको भनाइ छ ।

अहिले प्रतिनिधिसभामा विचाराधीन विधेयकहरू दफावार छलफलका लागि सम्बन्धित विषयगत समितिमा पठाउने गरी सम्भावित कार्यसूची तय भएको छ । यसैबीच थप विधेयक प्राप्त भए तिनलाई पनि समितिमा पठाएर अधिवेशन अन्त्य गर्ने सरकारको तयारी छ । त्यसपछि पुसमा नयाँ अधिवेशन बोलाउने र बैठक सुरु हुनासाथ विधेयकहरू द्रुत गतिमा पारित गर्दै अगाडि बढ्ने नेताहरूको सोचाइ रहेको बताइएको छ ।

अधिवेशनमा के-के भए

संघीय संसद्को चालू अधिवेशन २८ वैशाख २०८३ मा सुरु भएको थियो । यो अवधिमा सरकारले ल्याएको बजेट र बजेटसँग सम्बन्धित कानुन तयार भए । संसद् अधिवेशन नचलेको बेला ल्याइएका अध्यादेश पनि स्वीकृत भए । ती अध्यादेशले गरेका संशोधन समेटेर अध्यादेश प्रतिस्थापन विधेयक संसद्बाट पारित हुँदै ऐनमा परिणत भएका छन् ।

अधिवेशनका क्रममा मन्त्रीसँग प्रत्यक्ष प्रश्नोत्तर कार्यक्रम सञ्चालन भयो र समसामयिक विषयमा मन्त्रीहरूले सरकारको तर्फबाट सम्बोधन गरे । तर प्रधानमन्त्रीसँगको प्रत्यक्ष प्रश्नोत्तर कार्यक्रम भने सञ्चालन हुन सकेन ।

आगामी दिनका कार्यसूची

सार्वजनिक क्यालेन्डरअनुसार भदौ ३० गते परराष्ट्र मन्त्रालय तथा भूमि व्यवस्था, सहकारी, संघीय मामिला र सामान्य प्रशासन मन्त्रालयसँग सम्बन्धित मौखिक प्रश्नको जवाफ सम्बन्धित मन्त्रीले दिनेछन् । सोही दिन एशियाली विधायिकी संस्थाहरूको परिषद् (काउन्सिल अफ एसियन लेजिस्लेटिभ इन्स्टिच्युसन्स) क्यालीको सदस्यता प्राप्त गर्ने प्रस्ताव प्रतिनिधिसभाबाट अनुमोदन गर्ने कार्यसूची छ ।

• भदौ ३१ : बालबालिका सम्बन्धी पहिलो संशोधन विधेयकमाथि विचार गरियोस् भन्ने प्रस्ताव पेस

• असोज १ : संयुक्त राष्ट्र संघीय सामुद्रिक कानुनसम्बन्धी महासन्धिअन्तर्गत राष्ट्रिय क्षेत्राधिकारभन्दा बाहिरका क्षेत्रका सामुद्रिक जैविक विविधताको संरक्षण र दिगो प्रयोगसम्बन्धी सम्झौतामाथि सामान्य छलफल

• असोज ५ : बालबालिका सम्बन्धी (पहिलो संशोधन) विधेयक, २०८३ लाई दफावार छलफलका लागि सम्बन्धित समितिमा पठाउने प्रस्ताव

• असोज ६ : नागरिक लगानी कोष (तेस्रो संशोधन) विधेयक, २०८३ माथि विचार

• असोज ७ : भुक्तानी तथा फर्स्यौट (पहिलो संशोधन) विधेयक, २०८३ माथि विचार

• असोज १३ : सामुद्रिक जैविक विविधतासम्बन्धी सम्झौतामाथि छलफल तथा अनुमोदनको प्रस्ताव

क्यालेन्डरमा समेटिएका यी कार्यसूची सकिएपछि अधिवेशन अन्त्य हुने र त्यसपछि नयाँ अधिवेशनको तयारी सुरु हुने संसदीय स्रोतको भनाइ छ ।