भारतको दक्षिणपश्चिमी राज्य कर्नाटकको बेलगावी जिल्लामा मंगलबार बिहान फ्रिज विस्फोट हुँदा एकै परिवारका कम्तीमा चार जनाको ज्यान गएको छ। विस्फोटमा परी थप दुई जना घाइते भएका छन्।
प्रहरीका अनुसार बेलगावीको सेन्ट्रल बस स्ट्यान्ड नजिकै पर्ने चाभाट गल्लीमा सो परिवार बसोबास गर्दै आएको थियो। बिहानको समयमा उनीहरू बसेकै ठाउँमा फ्रिजमा विस्फोट भएको प्रहरीले जनाएको छ।
घटनामा घाइते भएका दुई जनाको शरीर करिब ६० प्रतिशतसम्म जलेको बताइएको छ।
बेलगावी कर्नाटकको राजधानी बेंगलुरुबाट करिब ५०६ किलोमिटर उत्तरपश्चिममा अवस्थित छ।
विस्फोटको कारण पत्ता लगाउन प्रहरीले मुद्दा दर्ता गरी अनुसन्धान अघि बढाएको जनाएको छ। सो घटनाबारे थप विवरण भने प्रहरीले सार्वजनिक गरेको छैन।
