नेपाल आयल निगमका ट्याङ्करबाट डिजेल चोरी भइरहेको अवस्थामा प्रहरीले एक जनालाई पक्राउ गरेको छ र तीन वटा ट्याङ्कर आफ्नो नियन्त्रणमा लिएको छ। रुपन्देहीको सिद्धार्थ नगरपालिका–०८ मा मंगलबार भएको यो कारबाहीका क्रममा करिब ३० लिटर डिजेल बरामद भएको छ।
लुम्बिनी प्रदेश प्रहरी कार्यालयबाट खटिएको टोली र वडा प्रहरी कार्यालय भैरहवाको संयुक्त टोलीले घटनास्थलमा पुग्दा ट्याङ्करको सिल भाँचिएको तथा पेट्रोलियम पदार्थ निकालिँदै गरेको अवस्था भेटिएको थियो। सोही क्रममा दुई वटा ट्याङ्कर घटनास्थलमै फेला परे, तर अर्को एक ट्याङ्कर भने त्यहाँबाट भागेपछि प्रहरीले पछ्याउँदै गई नियन्त्रणमा लिन सफल भएको जनाइएको छ।
नियन्त्रणमा लिइएका तीनै ट्याङ्कर र पक्राउ परेका व्यक्तिका सम्बन्धमा थप अनुसन्धान अघि बढाइएको प्रहरीले जानकारी दिएको छ।
