जहाज संख्याका हिसाबले विश्वको सबैभन्दा ठूलो वायुसेवा कम्पनी अमेरिकाको युनाइटेड एयरलाइन्स रहेको छ । पछिल्लो तथ्यांकअनुसार यससँग १ हजार १ सय १२ थान जहाज सञ्चालनमा छन् । कुन वायुसेवासँग कति जहाज छन् भन्ने विषय हवाई यात्रुबाहेक अरूलाई पनि चासोको विषय बन्ने गरेको छ ।
सन् २०२६ को तथ्यांकमा आधारित सूचीको दोस्रो स्थानमा अर्को अमेरिकी कम्पनी अमेरिकन एयरलाइन्स छ, जससँग १ हजार १३ जहाज छन् । तेस्रो स्थानमा पनि अमेरिककै डेल्टा एयरलाइन्स परेको छ । डेल्टासँग १ हजार ४ थान जहाज छन् । यसरी एक हजारभन्दा बढी जहाज आफैं उडाउने तीनवटा मात्र कम्पनी छन् र ती सबै अमेरिकी हुन् ।
चौथो स्थानमा भने चीनको चाइना साउदर्न एयरलाइन्स छ, जसको फ्लीटमा ८ सय ५० जहाज छन् । यो अमेरिका बाहिरको सबैभन्दा ठूलो तथा एसियाकै सबैभन्दा ठूलो वायुसेवा हो । कम्पनीले ग्वाङझाउ र बेइजिङलाई हब बनाएर उडान गरिरहेको छ र यसका २ सय २६ गन्तव्य छन् ।
जहाज संख्यामा पछि परे पनि फरक मापदण्डमा भने यी कम्पनीको अवस्था फरक छ । सूचीअनुसार अमेरिकन एयरलाइन्सले सबैभन्दा धेरै यात्रु बोक्छ, डेल्टा एयरलाइन्सको आम्दानी सबैभन्दा बढी छ भने युनाइटेड एयरलाइन्सले सबैभन्दा धेरै गन्तव्यमा उडान गर्छ ।
पाँचौंदेखि दशौं स्थानसम्म
पाँचौं नम्बरमा रहेको अमेरिकाको साउथवेस्ट एयरलाइन्ससँग ८ सय १० जहाज छन् । यो विश्वको सबैभन्दा ठूलो बोइङ ७३७ जहाज सञ्चालक कम्पनी हो । सन् १९७८ र १९८५ का बीचमा भाडामा लिएका सात थान बोइङ ७२७–२०० बाहेक यसले त्यसयता बोइङ ७३७ मात्र उडाइरहेको छ ।
छैटौं स्थानको चाइना इस्टर्न एयरलाइन्सले सांघाईबाट ६ सय ६४ जहाज उडाइरहेको छ । चीनका तीन सरकारी वायुसेवामध्ये दोस्रो मानिएको यो कम्पनी विश्वको छैटौं ठूलो वायुसेवा हो । सातौं स्थानमा रहेको आयरल्यान्डको र्यान एयर युरोपको सबैभन्दा ठूलो तथा विश्वकै सबैभन्दा ठूलो कम लागत वायुसेवा हो । कम्पनीसँग ६ सय ४७ जहाज छन्, जसमा ४ सय ११ बोइङ ७३७ नेक्स्ट जेनेरेसन, २ सय १० बी७३७–८–२०० र २६ एयरबस ३२० छन् । यसले थप ३ सय बोइङ ७३७ अर्डर गरेको छ ।
आठौं स्थानको अमेरिकी कम्पनी स्काइवेस्ट एयरलाइन्ससँग ५ सय ७९ जहाज छन् । नवौं स्थानको टर्किस एयरलाइन्सले ५ सय ४५ जहाजबाट १ सय ३० देशका २ सय ९० गन्तव्यमा उडान गरिरहेको छ र यो सबैभन्दा धेरै देश पुग्ने वायुसेवा हो । सन् २०२५ मा कम्पनीले २४ अर्ब १० करोड अमेरिकी डलर आम्दानी गरेको थियो ।
दशौं स्थानमा चीनको राष्ट्रिय ध्वजावाहक एयर चाइना छ, जससँग ५ सय १० जहाज छन् । चीनका ठूला वायुसेवामध्ये तेस्रो मानिएको यसले सन् २०२५ मा २३ अर्ब ४० करोड डलर आम्दानी गरेको थियो ।
सूचीको तल्लो भागमा चर्चित नाम
एघारौं स्थानमा भारतको निजी वायुसेवा इन्डिगो एयरलाइन्स छ, जसले ४ सय २५ जहाजबाट १ सय ३७ गन्तव्यमा दैनिक २ हजार ७ सय उडान गर्छ । सन् २०२५ मा इन्डिगोले ११ करोड ८० लाख यात्रु बोकेको थियो । बाह्रौं स्थानको अमेरिकी कम्पनी जेटब्लुले २ सय ७९ जहाजबाट अमेरिकाभरि १ सय ११ गन्तव्यमा उडान गर्छ र युरोपका केही सहरमा पनि सेवा दिन्छ ।
तेह्रौं स्थानको जर्मनीको लुफ्थान्सासँग २ सय ७४ जहाज छन् भने यसले थप १ सय ४० जहाज अर्डर गरेको छ । सन् २०२५ मा कम्पनीले ४५ अर्ब ७० करोड डलर आम्दानी गरेको थियो । चौधौं स्थानमा रहेको संयुक्त अरब इमिरेट्सको इमिरेट्ससँग २ सय ६६ जहाज छन् र यसले दुई प्रकारका मात्र जहाज प्रयोग गर्छ — १ सय १६ एयरबस ३८० र १ सय २७ बोइङ ७७७ ।
पन्ध्रौं स्थानमा बेलायतको ब्रिटिस एयरवेज छ, जसले २ सय ५४ जहाज उडाइरहेको छ र थप ७४ जहाज अर्डर गरेको छ । सन् २०२५ मा यसले ३८ अर्ब ३० करोड डलर आम्दानी गरेको थियो भने सन् २०२४ मा १२ करोड २० लाख यात्रु बोकेको थियो ।
सूचीमा उल्लेख भएअनुसार युनाइटेडको रणनीति नै ठूलो आकार हुने रहेको छ । कम्पनीले वार्षिक ३ खर्ब ३० अर्ब सिट माइल उड्छ र ३ सय ९२ गन्तव्यमा उडान गरिरहेको छ । सूचीको विवरणमा अगस्ट २०२६ सम्म युनाइटेडसँग १ हजार १ सय ३५ जहाज रहेको पनि उल्लेख छ । अमेरिकन एयरलाइन्सले भने अक्टोबर २०२५ सम्म थप ३ सय १ एयरबस र बोइङ जहाज अर्डर गरेको थियो ।
