नेपाली कांग्रेसका नेता गगन थापाले इतिहासलाई उत्सवका रूपमा मात्र नलिनु पर्ने बताएका छन्। इतिहासले शक्ति नभई शिक्षा दिने उनको भनाइ छ। उनका अनुसार त्यही शिक्षा नेपाली कांग्रेसले इतिहासका विभिन्न मोडमा उठेका प्रश्नहरूको उत्तर हो।
थापाका अनुसार ती प्रश्न हुन् — २००७ सालमा राणा शासनबाट मुक्ति, २०४६ सालमा पञ्चायती व्यवस्थाको अन्त्य, २०६२–६३ मा हिंसाको अन्त्य र २०७२ सालमा संविधान निर्माण। ती उत्तरले नै पार्टीलाई इतिहासका हरेक मोडमा महत्त्वपूर्ण बनाएको उनको तर्क छ।
तर आजको प्रश्न के हो भन्नेमा कांग्रेस केन्द्रित हुनुपर्ने उनले औंल्याए। हिजोको प्रश्नको उत्तर दिएर मात्र पार्टी टिक्न नसक्ने भन्दै उनले पहिले आजको प्रश्न पहिचान गर्नुपर्ने र त्यसको उत्तर दिनुपर्ने बताए।
यसका लागि कांग्रेस आफ्नो सीमित घेराबाट बाहिर निस्किनुपर्ने र बाहिरका जनताका कुरा सुन्नुपर्ने उनको भनाइ छ। विशेष गरी पार्टीले गर्दै आएका ऐतिहासिक संघर्षको अनुभव नै नभएका युवाका कुरा सुन्नुपर्नेमा उनले जोड दिए।
आफ्नो शैलीअनुसार थापाले पार्टी र आफैं पनि हिस्सा रहेको राजनीतिक संयन्त्रको आलोचना गर्दै पार्टीका पक्षमा बलियो तर्क प्रस्तुत गरे।
कांग्रेसले सबै कुरा ठीक गरेको दाबी भने उनले गरेनन्। आफ्ना कमजोरी स्वीकार गर्नुलाई नै उनले कांग्रेस रूपान्तरणको तर्कको अंग बनाए।
