विदेशका विश्वविद्यालय तथा अनुसन्धान संस्थाहरूसँगको शैक्षिक सहकार्य विस्तार गर्ने लक्ष्यसहित त्रिभुवन विश्वविद्यालयले विभिन्न मुलुकका लागि ‘कन्ट्री फोकल पर्सन’ नियुक्त गर्न आवेदन खुलाएको छ। विश्वविद्यालयको अन्तर्राष्ट्रिय सम्बन्ध केन्द्र (CIR) ले हालै स्वीकृत भएको ‘त्रिविको अन्तर्राष्ट्रियकरणसम्बन्धी निर्देशिका, २०२६’ को आधारमा इच्छुक स्थायी प्राध्यापकहरूबाट आशयपत्र माग गरेको हो।
उपकुलपतिबाट नियुक्त हुने यो पद स्वयंसेवी तथा मानार्थ हुनेछ र सुरुमा यसको कार्यकाल दुई वर्षको रहने त्रिविले जनाएको छ। नियुक्त हुने प्राध्यापकले आफ्नो जिम्मेवारीमा रहेको मुलुकका विश्वविद्यालयसँग यसअघि भएका सम्झौता (MoU) लाई सक्रिय बनाउने, संयुक्त अनुसन्धान तथा विद्यार्थी र प्राध्यापकबीचको आदानप्रदान प्रवर्द्धन गर्ने, अनुसन्धानका लागि आर्थिक स्रोत पहिचान गर्ने र विदेशी विद्यार्थीलाई त्रिविमा आकर्षित गर्न सहजीकरण गर्ने काम गर्नुपर्नेछ।
आवेदन दिन चाहने स्थायी प्राध्यापकले आगामी मंसिर १० गते (२५ नोभेम्बर २०२६) भित्र अनलाइन गुगल फारममार्फत निवेदन दिन सक्नेछन्। निवेदनसँगै आफ्नो अन्तर्राष्ट्रिय अनुभव, व्यक्तिगत विवरण (CV) तथा आगामी दुई वर्षका लागि तयार पारिएको ठोस कार्ययोजना संलग्न गर्नुपर्ने विश्वविद्यालयले जनाएको छ।
प्राप्त आवेदनमध्येबाट अन्तर्राष्ट्रिय अनुभव, सम्बन्धित मुलुकसँगको पूर्वसम्पर्क र सहकार्य विस्तार गर्न सक्ने क्षमतालाई मुख्य आधार बनाई छनोट गरिने त्रिविले जनाएको छ।







