फिफा विश्वकप २०२६ को दोस्रो सेमिफाइनल खेल एटलान्टा स्टेडियममा सुरु भएको छ । यस खेलमा साविक विजेता अर्जेन्टिना र इंग्ल्यान्ड आमनेसामने छन् ।
अर्जेन्टिना लगातार दोस्रो पटक विश्वकपको फाइनलमा पुग्ने लक्ष्यमा छ । इंग्ल्यान्ड भने ६० वर्षपछि उपाधि भिडन्तको खोजीमा मैदान उत्रिएको छ ।
अर्जेन्टिनाका कप्तान लियोनल मेसी आठ गोलसहित गोल्डेन बुटको दौडमा शीर्ष स्थानमा छन् । यता इंग्ल्यान्डका कप्तान ह्यारी केन र जुड बेलिङहमले समान ६-६ गोल गरेका छन् । एउटै विश्वकपमा कुनै टोलीका दुई खेलाडीले कम्तीमा ६-६ गोल गरेको यो दुर्लभ उपलब्धि हो ।
इंग्ल्यान्डले समूह चरणको पहिलो खेलमा क्रोएसियालाई ४-२ ले हराउँदै प्रतियोगिताको सुरुवात गरेको थियो । दोस्रो खेलमा घानासँग गोलरहित बराबरी खेलेको इंग्ल्यान्डले अन्तिम खेलमा पानामालाई २-० ले हराउँदै समूह विजेताका रूपमा नकआउट चरणमा प्रवेश गर्यो । अन्तिम ३२ मा कंगोविरुद्ध एक गोलले पछि परेको अवस्थाबाट २-१ को जित निकालेको इंग्ल्यान्डले अन्तिम १६ मा सहआयोजक मेक्सिकोलाई दस खेलाडीमा सीमित हुँदै पनि संघर्षपूर्ण ३-२ ले हरायो । क्वाटरफाइनलमा नर्वेविरुद्ध पनि सुरुवाती अग्रता गुमाएको इंग्ल्यान्डलाई बेलिङहमले दुई गोल गर्दै २-१ को जित दिलाएका थिए । यससँगै इंग्ल्यान्ड पछिल्ला तीन विश्वकपमध्ये दोस्रो पटक सेमिफाइनलमा पुगेको हो ।
यता साविक विजेता अर्जेन्टिनाले समूह चरणको पहिलो खेलमै अल्जेरियालाई ३-० ले हराउँदै उपाधि रक्षा अभियान सुरु गरेको थियो । मेसीले उक्त खेलमा ह्याट्रिक गर्दै विश्वकप इतिहासकै सर्वाधिक गोलकर्ताको कीर्तिमान बनाएका थिए । त्यसपछि अर्जेन्टिनाले अस्ट्रियालाई २-० र जोर्डनलाई ३-१ ले हराउँदै समूह विजेता बन्यो । अन्तिम ३२ मा केप भर्डेविरुद्ध अतिरिक्त समयमा ३-२ को कठिन जित निकालेको अर्जेन्टिनाले अन्तिम १६ मा इजिप्टलाई पनि अन्तिम समयमा पुनरागमन गर्दै ३-२ ले हरायो । क्वाटरफाइनलमा स्विट्जरल्यान्डले निर्धारित समयमा कडा चुनौती दिए पनि अतिरिक्त समयमा जुलियन अल्भारेज र लाउतारो मार्टिनेजको गोलमा अर्जेन्टिनाले ३-१ को जित निकाल्दै लगातार दोस्रो पटक सेमिफाइनल यात्रा तय गरेको थियो ।