पोखरा पुगेका ५१ जना विदेशी पर्यटकले बुधबार भाइटीका लगाएका छन् । तिहारका अवसरमा होटल संघ पोखराले आयोजना गरेको भाइटीका महोत्सवमा सहभागी भएर उनीहरूले नेपाली परम्पराअनुसार दिदीबहिनीको हातबाट टीका ग्रहण गरेका हुन् ।
महोत्सवमा अमेरिका, बेलायत, चीन, जापान र अस्ट्रेलियासहित विभिन्न १५ देशका पर्यटक सहभागी थिए । रेन्वो चिल्ड्रन होम नेपालका छात्राहरूले उनीहरूलाई भाइटीका लगाइदिएका थिए ।
संघका अध्यक्ष लक्ष्मण सुवेदीले यो महोत्सव संस्कृतिकै माध्यमबाट पर्यटन प्रवर्द्धन गर्ने र आपसी भाइचारा बढाउने उद्देश्यले आयोजना गरिएको बताए । विदेशी अतिथिलाई नेपाली चाडपर्वसँग प्रत्यक्ष जोड्ने यस्ता कार्यक्रमले पोखराको सांस्कृतिक पक्ष पनि पर्यटकमाझ पुर्याउने उनको भनाइ छ ।
कार्यक्रममा पर्यटकले देउसी खेल्नुका साथै नाचगान गरेर रमाइलो गरेका थिए । उनीहरूलाई सेलरोटी चखाइएको थियो भने महिला पर्यटकलाई पछ्यौरा र पुरुषलाई ढाका टोपी उपहारस्वरुप दिइएको थियो ।
