काठमाडौँ — देशभर मनसुनको प्रभाव बढेसँगै आगामी २४ घण्टामा अधिकांश स्थानमा भारीदेखि अति भारी वर्षाको सम्भावना रहेको जल तथा मौसम पूर्वानुमान महाशाखाले जनाएको छ । मनसुनको न्यून चापीय रेखा पश्चिममा सरदर स्थानभन्दा केही माथि नेपालको तराई आसपास र पूर्वमा सरदर स्थान आसपास रहेको छ ।
हाल कोशी, बागमती, गण्डकी र लुम्बिनी प्रदेशका केही भाग तथा कर्णालीका एकदुई स्थानमा हल्कादेखि मध्यम वर्षा भइरहेको छ । महाशाखाका अनुसार दिउँसो देशभर बदली रही धेरै स्थानमा मेघगर्जन र चट्याङसहित मध्यम वर्षाको सम्भावना छ । उच्च हिमाली क्षेत्रमा हिमपातको पनि सम्भावना छ ।
भारी वर्षाको सम्भावना
कोशी, लुम्बिनी र सुदूरपश्चिम प्रदेशका पहाडी तथा तराई क्षेत्रका केही स्थानमा भारीदेखि धेरै भारी वर्षाको सम्भावना रहेको छ । त्यस्तै, बागमती र गण्डकी प्रदेशका केही स्थानसँगै मधेस प्रदेशका तराई क्षेत्रमा पनि भारी वर्षा हुन सक्ने महाशाखाले जनाएको छ । कोशी, गण्डकी, लुम्बिनी र सुदूरपश्चिम प्रदेशका पहाडी तथा तराईका एकदुई स्थानमा अति भारी वर्षाको सम्भावना छ ।
राति पनि देशभर बदली रहने र धेरै स्थानमा मेघगर्जनसहित वर्षा हुने महाशाखाको भनाइ छ । कोशी र सुदूरपश्चिम प्रदेशका पहाडी क्षेत्रका अधिकांश स्थान तथा बागमती, गण्डकी, लुम्बिनी र कर्णाली प्रदेशका पहाडी र तराईका अधिकांश स्थानमा मध्यम वर्षाको सम्भावना छ । कोशी, गण्डकी, लुम्बिनी र सुदूरपश्चिमका केही स्थानमा भारीदेखि धेरै भारी वर्षा तथा मधेस र बागमतीका एकदुई स्थानमा भारी वर्षा हुन सक्नेछ । कोशी र सुदूरपश्चिमका एकदुई स्थानमा अति भारी वर्षाको सम्भावना छ ।
जोखिम र सतर्कता
अत्यधिक वर्षाका कारण आकस्मिक बाढी, पहिरो, डुबान, गेग्रान बहाव र कटानको जोखिम बढ्न सक्ने भएकाले सर्वसाधारणलाई आवश्यक सतर्कता अपनाउन महाशाखाले आग्रह गरेको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरणले पनि उच्च सतर्कता अपनाउन अनुरोध गरेको छ ।
मौसम पूर्वानुमान महाशाखाले श्रावण ३ गतेको यो जानकारी सार्वजनिक गरेको हो ।