काँकडभिट्टा नाका हुँदै भारत पुग्ने नेपाली चियाको निर्यात गत आर्थिक वर्षमा घटेको छ। काँकडभिट्टा भन्सार कार्यालयको तथ्याङ्कले निर्यातको परिमाण र आम्दानी दुवै घटेको देखाएको हो।
आर्थिक वर्ष २०८२/८३ मा यस नाकाबाट रु ३ अर्ब ५२ करोड ९६ लाख ६९ हजार मूल्य बराबरको १३ हजार ४५ मेट्रिक टन चिया भारततर्फ निर्यात भएको कार्यालयले जनाएको छ। यसअघि आव २०८१/८२ मा रु ४ अर्ब १६ करोड ९३ लाख ५८ हजार मूल्य बराबरको १५ हजार ३११ मेट्रिक टन चिया निर्यात भएको थियो। दुई आर्थिक वर्षको तुलना गर्दा निर्यात आम्दानीमा रु ६३ करोड ९६ लाख ८९ हजारको गिरावट देखिन्छ।
निर्यातमा चियाको स्थान दोस्रो
काँकडभिट्टा नाकाबाट हुने निर्यातमा अलैँचीपछि सबैभन्दा बढी हिस्सा चियाको रहँदै आएको छ। प्रमुख भन्सार प्रशासक शिवलाल न्यौपानेका अनुसार यस नाकाबाट हुने निर्यातमा चिया दोस्रो स्थानमा पर्छ। भारतीय बजारमा मूल्य उतारचढाव आउनु, गुणस्तर परीक्षणका क्रममा गैर-भन्सार अवरोध देखिनु र अन्तर्राष्ट्रिय मागअनुसार उत्पादन र मूल्य निर्धारणमा परिवर्तन आउनुले निर्यात प्रभावित भएको उनले बताएका छन्।
अर्थतन्त्रमा पर्ने असर
सिटिसी र अर्थोडक्स प्रजातिका नेपाली चियाको ठूलो हिस्सा काँकडभिट्टा नाकाबाट भारतीय बजार पुग्ने गर्छ। निर्यातमा आएको गिरावटका कारण चिया किसान र उद्योगी मर्कामा पर्नुका साथै समग्र वैदेशिक व्यापार घाटा थप चौडा हुने देखिन्छ।