ज्योति रानाभाटको जीवनरक्षाका लागि नर्स जीता बराल पनि अनशनमा

नर्सहरूको अधिकार र पेसागत सुरक्षाका माग उठाइरहेकी नर्स ज्योति रानाभाटको जीवनरक्षाका लागि अर्की नर्स जीता बराल पनि अनशनमा बसेकी छन्। बरालले मंगलबार साँझदेखि नेपाल नर्सिङ एसोसिएसनको प्रांगणमा अनशन थालेकी हुन्।

रानाभाटले गत बिहीबारदेखि नर्सहरूको पेसागत सुरक्षाका १५ बुँदे मागसहित आमरण अनशन सुरु गरेकी थिइन्। उनी अहिले छ दिनदेखि अनशनरत छन्। अनशनका कारण स्वास्थ्य बिग्रिएपछि शनिबार उनलाई वीर अस्पताल भर्ना गरियो। त्यसपछि अवस्था झन् जटिल बनेपछि उनलाई आईसीयूमा राखिएको छ।

जीवनरक्षाको मागसहित थपियो नयाँ आवाज

रानाभाटको उपचारमा अस्पतालले पर्याप्त चासो देखाएको छैन भन्ने आरोप बरालले लगाएकी छन्। साथै उनको अवस्थाबारे बाहिर जानकारी नदिइएको र सरकारले समयमै माग सम्बोधन नगरेको उनको गुनासो छ। त्यसैले रानाभाटको जीवन जोगाउन आफू पनि अनशनमा बस्नुपरेको उनले बताएकी छन्।

वीर अस्पतालको जानकारी

मंगलबार आधिकारिक पेजमार्फत वीर अस्पतालले रानाभाटको शरीरमा पानी, मिनरल तथा फस्फोरसको मात्रा घटेको जनाएको छ। उनको स्वास्थ्य अवस्था निरन्तर निगरानीमा रहेको अस्पतालले बताएको छ।

सांसद कार्कीद्वारा भेट, स्वास्थ्यकर्मीको चिन्ता

मंगलबार साँझ सांसद तोसिमा कार्की रानाभाटलाई भेट्न वीर अस्पताल पुगेकी थिइन्। भेटघाट मात्र आफ्नो उद्देश्य रहेको उनले बताएकी छन्।

अस्पताल परिसरमा रहेका नर्स तथा स्वास्थ्यकर्मीहरूले सरकारले समयमै माग सम्बोधन नगर्दा रानाभाटको स्वास्थ्यमाथि खतरा बढेको बताएका छन्। उनीहरूका अनुसार लामो समयसम्म केही नखाँदा शरीरमा पानीको मात्रा अत्यधिक घट्ने, मिर्गौला फेल हुन सक्ने र अन्य गम्भीर जटिलता निम्तिन सक्ने जोखिम छ।