नेपाली कांग्रेसको इतर समूहले आयोजना गर्न लागेको राष्ट्रिय भेलालाई सम्बोधन गर्ने कार्यक्रमसहित निवर्तमान सभापति शेरबहादुर देउवा साउन २६ गते स्वदेश फर्कने भएका छन्।
शुक्रबार इतर समूहले आयोजना गरेको पत्रकार सम्मेलनमा डा. शशांक कोइरालाले देउवा साउन २६ गते काठमाडौं आउने जानकारी दिए। उनका अनुसार इतर समूहको तर्फबाट हुने राष्ट्रिय भेलालाई देउवाले सम्बोधन गर्ने कार्यक्रम रहेको छ।
राष्ट्रिय भेला कार्यक्रम
इतर समूहले साउन २९, ३० र ३१ गते राष्ट्रिय भेला आयोजना गर्दैछ। पत्रकार सम्मेलनमा डा. कोइरालाले सो भेलाको तयारी र उद्देश्यका बारेमा समेत जानकारी गराएका थिए।
धरपकड भए विरोध गर्ने चेतावनी
पत्रकार सम्मेलनमा बोल्दै डा. कोइरालाले देउवा स्वदेश फर्किँदा राज्यले धरपकड गर्न खोजे त्यसको विरोधमा उत्रिने चेतावनी समेत दिए।
जेनजी आन्दोलनपछि उपचारका लागि देउवा श्रीमती आरजु राणासँग हङकङ गएका थिए। उनी अहिले स्वदेश फर्कन लागेका हुन्।
