बिहीबार देशभरको मौसममा चर्को गर्मी र भारी वर्षा दुवैको सम्भावना देखिएको छ। मौसम पूर्वानुमान महाशाखाले जनकपुरको अधिकतम तापक्रम ३८ देखि ४० डिग्री सेल्सियससम्म पुग्न सक्ने जनाएको छ।
यस्तै, धनगढीमा अधिकतम तापक्रम ३७ देखि ३९ डिग्री सेल्सियस रहने अनुमान छ। नेपालगन्ज, भैरहवा र विराटनगरमा पनि अधिकतम तापक्रम ३८ डिग्री सेल्सियससम्म पुग्न सक्ने महाशाखाको भनाइ छ।
भारी वर्षाको सम्भावना
तापक्रम बढ्ने क्रमसँगै कतिपय प्रदेशमा भने भारी वर्षाको पूर्वानुमान छ। गण्डकी प्रदेशका हिमाली तथा पहाडी भेगका केही स्थानमा भारी वर्षा हुनसक्ने महाशाखाले जनाएको छ। बागमती, कोशी र लुम्बिनी प्रदेशका केही भागमा पनि भारी वर्षाको सम्भावना छ।
रातिको समयमा वर्षा अझ बढ्ने देखिन्छ। गण्डकी र लुम्बिनी प्रदेशका हिमाली तथा पहाडी क्षेत्रका एक–दुई स्थानमा अति भारी वर्षा हुनसक्ने पूर्वानुमान छ। त्यस्तै, बागमती, कोशी, गण्डकी, लुम्बिनी र कर्णालीका केही भागमा भारी वर्षाको सम्भावना रहेको महाशाखाले जनाएको छ।
पोखरा र काठमाडौंको मौसम
पोखरामा भारी वर्षासहित चट्याङ लाग्ने सम्भावना छ। त्यहाँ दिउँसो ४० प्रतिशत र राति ६० प्रतिशत वर्षाको सम्भावना रहेको अनुमान छ।
काठमाडौं उपत्यकामा बदली रही मध्यम वर्षासहित चट्याङ लाग्न सक्ने महाशाखाले जनाएको छ। दिउँसोको तापक्रम ३१ देखि ३३ डिग्री सेल्सियस र रातिको तापक्रम २१ देखि २३ डिग्री सेल्सियस रहने अनुमान छ। काठमाडौंमा दिउँसो ६० प्रतिशत र राति ७० प्रतिशत वर्षाको सम्भावना छ।
अन्य क्षेत्र र मनसुनको अवस्था
कोशी, बागमती, गण्डकी र लुम्बिनी प्रदेशका अधिकांश हिमाली तथा पहाडी क्षेत्रमा चट्याङसहित मध्यम वर्षा वा हिमपात हुने सम्भावना छ। बागमती, गण्डकी र लुम्बिनीका तराई भेग तथा मधेश प्रदेशका केही भागमा पनि चट्याङसहित मध्यम वर्षा हुनसक्ने महाशाखाले जनाएको छ।
महाशाखाका अनुसार अहिले मनसुन देशभर नै सक्रिय छ। मनसुनको न्यून चापीय रेखा भने आफ्नो औसत स्थानमा रहेको छ।
