हुम्लाको नाम्खा गाउँपालिका–२ स्थित नावलथाङमा प्रहरीले अवैध रूपमा राखिएको ठूलो परिमाणको मदिरा बरामद गरेको छ। जिल्ला प्रहरी कार्यालय हुम्लाका अनुसार फेला परेका मदिराको बजार मूल्य ५१ लाख ९३ हजार ६०० रुपैयाँ पुग्छ।
कार्टुनमा लुकाईछिपाई राखिएको थियो
प्रहरीका अनुसार नावलथाङबाट ५९४ कार्टुनमा राखिएका ७ हजार १२८ बोतल चिनियाँ मदिरा र १९४ कार्टुनमा भएका ४ हजार ६५६ बोतल बडवाइजर बियर बरामद भएका छन्। जिल्ला प्रहरी कार्यालयका डिएसपी शंकर खडकाले लुकाईछिपाई राखिएको अवस्थामा मदिरा फेला परेको जानकारी दिए।
उनका अनुसार चिनियाँ मदिराको अनुमानित बजार मूल्य प्रतिबोतल ५०० रुपैयाँ र बडवाइजर बियरको प्रतिबोतल ३५० रुपैयाँ रहेको छ।
मदिरा नष्ट गरिने
बरामद मदिरालाई कोष तथा लेखा नियन्त्रण कार्यालय हुम्लाको रोहबरमा नष्ट गरिने प्रमुख जिल्ला अधिकारी भोलानाथ गुरागाइले बताएका छन्।
