झापा गाउँपालिकामा टिपरको ठक्करबाट साइकल चलाइरहेका एक वृद्धको ज्यान गएको छ। मृत्यु हुनेमा झापा गाउँपालिका–३ निवासी ६५ वर्षीय इशनलाल गणेश रहेका छन्।
घटनाको विवरण
शनिबार साँझ करिब ५:२० बजे झापा–४ को वडा कार्यालय अगाडि साइकलमा गइरहेका गणेशलाई ना.५ ख ६४९० नम्बरको टिपरले ठक्कर दिएको थियो। सोही दुर्घटनामा उनी गम्भीर घाइते भएका थिए।
घाइते अवस्थामा उनलाई उपचारका लागि बिर्तामोडस्थित बीएन्डसी अस्पताल पुर्याइएको थियो। अस्पतालमा उपचारको क्रममा उनको मृत्यु भएको प्रहरीले जनाएको छ।
चालक नियन्त्रणमा
दुर्घटना गराएको आरोपमा टिपर चालक झापा गाउँपालिका–३ कामटोलीका ३६ वर्षीय फागुलाल राजवंशीलाई प्रहरीले नियन्त्रणमा लिएको छ। घटनाबारे थप अनुसन्धान भइरहेको प्रहरीले बताएको छ।
