नवलपरासीको हुप्सेकोट गाउँपालिका-५ मा रहेको धौबादी फलाम खानीबाट करिब ९६ मिलियन टन फलाम अयस्क निकाल्ने योजना अघि सारिएको छ। धौबादी आइरन कम्पनी लिमिटेडले सो प्रस्तावसहितको प्रतिवेदन खानी तथा भूगर्भ विभागमा बुझाएको हो।
करिब ४१ वर्ग किलोमिटर क्षेत्रफलमा फैलिएको उक्त खानीलाई दुई ब्लकमा विभाजन गरिएको छ। धौबादी पोखरी ब्लक २५ वर्ग किलोमिटर र दुर्लुङ ब्लक १६ वर्ग किलोमिटर क्षेत्रफलमा रहेका छन्। योजना स्वीकृत भएपछि थप अन्वेषण र उत्खननका काम अघि बढाइने कम्पनीले जनाएको छ।
नेपालमा व्यावसायिक रूपमा फलाम उत्पादन गर्ने उद्देश्यले स्थापना भएको धौबादी आइरन कम्पनीले भूमिगत फलामका नमुना परीक्षणका लागि १२ स्थानमा जम्मा एक हजार ५०० मिटर ड्रिलिङ कार्य सम्पन्न गरेको छ। कम्पनी निर्देशक शैलेश कुमार थापाले सो जानकारी दिए।
यसैबीच वातावरणीय प्रभाव मूल्याङ्कन भइरहेको र विस्तृत परियोजना प्रतिवेदन (डिपीआर) चाँडै सुरु गरिने कम्पनीले जनाएको छ। खानी सञ्चालनमा आएपछि उत्पादित फलामजन्य सामग्रीले नेपालको कुल फलाम आयातको करिब २५ प्रतिशत प्रतिस्थापन गर्न सकिने थापाले बताए।
उनका अनुसार परियोजनाबाट ठूलो संख्यामा रोजगारी सिर्जना हुने र राष्ट्रिय अर्थतन्त्रमा योगदान पुग्नेछ। खानीमा पहुँचका लागि आवश्यक पूर्वाधार विकास र सडक स्तरोन्नतिका काम पनि जारी रहेको कम्पनीले जनाएको छ।
