रौतहटको बौधीमाई नगरपालिका–८ स्थित सर्मुज्वामा मंगलबार मध्यराति प्रहरी र सशस्त्र प्रहरीको टोलीले घरमा छापा मारी दुई भाइलाई पक्राउ गरेको छ। सो क्रममा ७० वर्षीया एक महिला र १६ वर्षीया किशोरी घाइते भएका छन्। टोलीले घरको मूल ढोका फोरेर भित्र छिरेको परिवारको आरोप छ।
पक्राउ पर्नेमा सोही घरका शिव पूजन यादव र नवल किशोर यादव रहेका छन्। उनीहरूमाथि सोमबार बिहान बनकुल बजारमा भएको झडपमा संलग्न रहेको आरोप छ। सो दिन सशस्त्र प्रहरीको टोलीले भन्सार जाँचपास नगरिएको आशंकामा एक समूहले ओसारिरहेको सामान रोक्न खोज्दा ती समूहले ढुंगा प्रहार गरेको थियो। झडपमा सशस्त्र प्रहरी निरीक्षक लोकेन्द्र पुलामी मगरको औंला भाँचिएको प्रहरीले जनाएको छ।
त्यही घटनाका आरोपित भाइहरू लुकेर बसेको अवस्थामा मध्यराति पक्राउ गरिएको जिल्ला प्रहरी कार्यालय रौतहटका प्रवक्ता डीएसपी बसन्त गौतमले बताए। परिवारका अनुसार पक्राउ गर्ने क्रममा बिचमा लाग्न खोज्ने आफन्तलाई सुरक्षाकर्मीले लाठी प्रहार गरेका थिए।
सोही क्रममा बसाकलिया देवी (७०) र उनकी नातिनी करिश्मा यादव (१६) घाइते भएका हुन्। दुवैको गौरस्थित प्रादेशिक अस्पतालमा उपचार भइरहेको छ। बसाकलियाको टाउकोमा सात र करिश्माको छ टाँका लगाइएको बताइएको छ।
बसाकलियाका अनुसार पक्राउ रोक्न खोज्दा आफूमाथि प्रहार भएको थियो। उनले मध्यराति घरभित्र छिर्नुको कारणबारे प्रश्न समेत गरेकी छन्।
मध्यराति घरमा प्रवेश गरेको विषयलाई लिएर कानुनी प्रश्न उठेपछि प्रवक्ता गौतमले विशेष परिस्थितिमा जुनसुकै समय पनि पक्राउ गर्न सकिने बताए। तर महिला घाइते भएको विषयमा आफूलाई जानकारी नभएको उनको भनाइ छ।
