काठमाडौं — मैतीघरस्थित सेन्ट जेभियर्स कलेजको मेजर आर्ट्स विभागले गाब्रिएल गार्सिया मार्केजको कथा 'ए भेरी ओल्ड म्यान विद इनर्मस विङ्स' मा आधारित नेपाली नाटक 'बिचित्र बाजे' को तीनदिने मञ्चन सुरु गरेको छ।
पहिलो प्रदर्शन बिहीबार थापाथलीस्थित लोयोला क्याम्पसको मिलर हलमा भएको थियो। कलेजका अनुसार बाँकी प्रदर्शन अगस्ट २१ मा बिहान ८:३० बजे र मध्याह्न १२ बजे तथा अगस्ट २२ मा बिहान ११:३० बजे र दिउँसो ३ बजे हुनेछ।
मेजर आर्ट्सका विद्यार्थी कृतिका कोइराला र रौनक कार्कीले लेखेको यो नाटकले मार्केजको कथालाई नेपाली परिवेशमा राखेर पखेटा भएको रहस्यमय वृद्धको आगमनपछि गाउँले समुदायले देखाउने प्रतिक्रियालाई प्रस्तुत गर्दछ। दया, करुणा, विश्वास, डर र भिन्न व्यक्तिहरूसँगको व्यवहारजस्ता विषयवस्तुलाई नाटकले उठान गरेको छ।
यो प्रस्तुति पूर्णरूपमा विद्यार्थीकै नेतृत्वमा रहेको छ। अभिनय, लेखन, मञ्च निर्माण र प्रप्स व्यवस्थापनमा विद्यार्थीहरू संलग्न छन् भने शिक्षकहरूले मार्गदर्शन गरेका छन्। कलेजका अनुसार यो नाटक विद्यार्थीहरूको नाट्य विधासँगको शैक्षिक संलग्नताको अंश हो, जसले उनीहरूको आत्मविश्वास, सिर्जनात्मकता र सामूहिक कार्य क्षमता विकास गर्ने उद्देश्य राख्दछ।
यसपटक दृष्टिविहीन दर्शकका लागि प्रत्यक्ष अडियो विवरण पनि उपलब्ध गराइएको छ। स्वयंसेवकहरूले गुगल मिटको प्रत्यक्ष सत्रमार्फत नाटकका गतिविधि, अभिव्यक्ति, पोशाक र प्रमुख दृश्य तत्वहरू वर्णन गर्नेछन्। यस सेवाका लागि इयरफोन र इन्टरनेटको सुविधा कलेजले मिलाएको छ।
कलेजका प्रिन्सिपल फादर डा. अगस्टिन थमस (एसजे)ले नाटकले साहित्यिक कृतिलाई रंगमञ्चीय अनुभवमा बदल्न सक्ने विद्यार्थीको क्षमता देखाएको र दर्शकलाई मानवीय गरिमाबारे चिन्तन गर्न प्रेरित गरेको बताए। मेजर आर्ट्स विभागका प्रमुख शिशिर कुमार भुसालले समसामयिक समाजमा सहानुभूति, भावनात्मक बुद्धिमत्ता, मानवीय साक्षरता र अन्तरव्यक्तिगत सञ्चारको महत्त्वलाई यस प्रस्तुतिले उजागर गरेको टिप्पणी गरे।
