सर्लाही, अगस्ट २० — सर्लाही प्रहरीले कौडेना गाउँपालिका–१ स्थित लक्ष्मीपुरको एउटा माटोको घरमा लुकाएर राखिएको ३०० केजी लागुऔषध गाँजा बरामद गरेको छ। गोप्य सूचनाका आधारमा प्रहरी टोलीले बिजन पटेलको घरमा छापा मारेको थियो। खानतलासीका क्रममा १५ बोरामा प्याक गरिएको अवस्थामा गाँजा फेला परेको प्रहरीले जनाएको छ।
घरका मालिक पटेल भने फरार रहेका छन्। जिल्ला प्रहरी कार्यालय सर्लाहीका प्रवक्ता डीएसपी बेदप्रसाद गौतमका अनुसार उनको खोजीका लागि प्रहरी परिचालन गरिएको छ।
प्रहरीले जिल्लाका सीमावर्ती क्षेत्र हुँदै भारततर्फ लागुऔषध तस्करी हुने गरेको भन्दै त्यसलाई रोक्न निगरानी कडा पारेको छ। गौतमले लागुऔषधको अवैध कारोबार तथा ओसारपसारमा संलग्न व्यक्तिहरूमाथि निगरानी बढाइएको बताए। फरार आरोपितको खोजी र थप अनुसन्धान जारी रहेको प्रहरीले जनाएको छ।
