भोटेकोशी नदीमा बुधबार आएको बाढीका कारण रसुवा र नुवाकोटका विभिन्न क्षेत्रमा ठूलो क्षति भएको छ। बाढीमा परी तीन जनाको मृत्यु भएको छ भने १७ जनाको उद्धार गरिएको छ। रसुवा भन्सार कार्यालयका १४ कर्मचारी भने सम्पर्कविहीन छन्।
नुवाकोट जिल्ला प्रहरी कार्यालयका प्रमुख विपिन रेग्मीका अनुसार त्रिशूली नदी किनारबाट तीन जनाको शव फेला परेको छ। सिमचौरमा दुई र कोलपुटारमा एक गरी तीन शव बरामद गरिएका हुन्। शवको पहिचान भने खुल्न सकेको छैन।
बाढीमा फँसेका पाँच जनाको उद्धार गरी बिदुर नगरपालिका–४ स्थित चक्रदेव अस्पताल पुर्याइएको छ। सडक र पुल बगाएपछि त्रिशूली अस्पताल पुग्ने बाटो अवरुद्ध भएको छ।
यसअघि नेपाली सेनाले हेलिकप्टरमार्फत १२ जनाको उद्धार गरेको थियो। स्याफ्रुबेसीका छ, माइलुङका दुई र धुन्चेका चार जनालाई हेलिकप्टरबाट सुरक्षित स्थानमा पुर्याइएको हो। खोज तथा उद्धारका लागि सेनाका चार र निजी क्षेत्रका आठ गरी १२ हेलिकप्टर परिचालन गरिएका छन्।
त्रिशूली बजार क्षेत्रमा व्यापक क्षति
तिब्बततर्फबाट भोटेकोशी नदी हुँदै नेपाल भित्रिएको बाढीले नुवाकोटको त्रिशूली बजार नजिकका करिब ६० घर बगाएको छ। दुईवटा सवारीसाधन चल्ने पुलमा समेत क्षति पुगेको छ भने देवीघाट क्षेत्र पनि प्रभावित भएको छ।
बाढीले त्रिशूली र देवीघाट जलविद्युत् आयोजनामा क्षति पुर्याएको छ। २५ मेगावाट क्षमताको सौर्य ऊर्जा प्लान्टका तीन ब्लक र एक सबस्टेसन पनि बगाएको छ। त्रिशूली नदी किनारका बासिन्दाले पूर्वचेतावनी पाएर सुरक्षित स्थानतर्फ लागेकाले नुवाकोटमा थप मानवीय क्षति भएको प्रारम्भिक विवरण छैन।
भन्सार कार्यालयका १४ कर्मचारी सम्पर्कविहीन
तिमुरेस्थित रसुवा भन्सार कार्यालयका १४ कर्मचारी बाढीपछि सम्पर्कविहीन भएका छन्। सम्पर्कविहीनमध्ये ११ स्थायी र तीन करारका कर्मचारी रहेका छन्। अर्थ मन्त्रालयको सचिवालयका अनुसार प्रमुख भन्सार प्रशासक राजेन्द्र ढुंगासहित २५ कर्मचारीको भने सम्पर्क भइसकेको छ।
सरकारले खोज, उद्धार र राहतका कामलाई तीव्रता दिएको छ। नेपाल प्रहरी, सशस्त्र प्रहरी बल, नेपाली सेना र जिल्ला प्रशासन परिचालन गरिएको छ। प्रधानमन्त्री बलेन्द्र शाहले समन्वित रूपमा काम गर्न सम्बद्ध निकायलाई निर्देशन दिएका छन्। राष्ट्रपति रामचन्द्र पौडेलले सरकारी निकाय, राजनीतिक दल, सामाजिक संस्था र नागरिकलाई उद्धार तथा राहतमा सक्रिय हुन आग्रह गरेका छन्।
जल तथा मौसम विज्ञान विभागले यो बाढी वर्षाका कारण नआएको बताएको छ। पछिल्लो २४ घण्टामा रसुवामा सात मिलिमिटरभन्दा कम वर्षा मापन भएको थियो। अधिकारीहरूले हिमताल विस्फोट (जीएलओएफ) को सम्भावनाबारे अध्ययन गरिरहेका छन्।
विश्व स्वास्थ्य संगठन (डब्ल्यूएचओ) ले करिब एक हजार मानिसका लागि औषधि तथा स्वास्थ्य सामग्रीसहित १५ वटा आपत्कालीन पाल पठाउने तयारी गरेको छ। स्वास्थ्य मन्त्रालयले काठमाडौंको वीर अस्पताल र ट्रमा सेन्टरमा १०० आपत्कालीन शय्या आरक्षित गरेको छ। मन्त्रालयले छ जना डाक्टर र दुई नर्स परिचालन गर्नुका साथै औषधिसहितको एम्बुलेन्स प्रभावित क्षेत्रतर्फ पठाएको छ।
