नेपाल विद्युत् प्राधिकरणले बुधबार रसुवाको भोटेकोशी नदीमा आएको बाढीका कारण १२ वटा विद्युत् गृहमा क्षति पुगेको जनाएको छ। प्राधिकरणका अनुसार क्षतिग्रस्तमध्ये ११ जलविद्युत् गृह र एक सोलार विद्युत् गृह रहेका छन्। यी आयोजनाका कारण कुल ४३१ दशमलव १ मेगावाट विद्युत् राष्ट्रिय प्रणालीबाट विच्छेद भएको छ।
बाढीबाट क्षति पुगेका विद्युत् आयोजनाहरूको विवरण यस्तो छ: १११ मेगावाटको रसुवागढी जलविद्युत् आयोजना, ७८ मेगावाटको सलासुङ्गी (सान्जेन), १४ दशमलव ८ मेगावाटको अपर साञ्जेन, ४२ दशमलव ५ मेगावाटको सान्जेन र २२ मेगावाटको चिलिमे जलविद्युत् आयोजना।
यस्तै, २० मेगावाटको लाङटाङ, ६० मेगावाटको अपर त्रिशूली–३ ‘ए’, १४ दशमलव ८ मेगावाटको अपर मैलुङ, ५ मेगावाटको मैलुङ, २४ मेगावाटको त्रिशूली र १४ मेगावाटको देवीघाट जलविद्युत् आयोजनामा समेत बाढीले क्षति पुर्याएको प्राधिकरणले बताएको छ। साथै, २५ मेगावाट क्षमताको सोलार विद्युत् प्रणालीमा पनि क्षति पुगेको छ।
