काठमाडौं । हिमालयन एयरलाइन्सका कर्मचारीले प्रधानमन्त्री दैवी प्रकोप उद्धार कोषमा १३ लाख रुपैयाँ जम्मा गरेका छन्। कर्मचारीहरूबाट स्वेच्छिक रूपमा संकलन गरिएको कुल १४ लाख ७० हजार ६ सय ६६ रुपैयाँमध्ये सो रकम कोषमा पठाइएको कम्पनीले जानकारी दिएको छ।
संकलित रकमको बाँकी हिस्सा भने बाढीबाट प्रभावित आफ्नै कर्मचारीका परिवारलाई उपलब्ध गराइएको कम्पनीको भनाइ छ। यसका अतिरिक्त कर्मचारीहरूले विपद्बाट प्रभावित नागरिकका लागि लुगासमेत संकलन गरेका थिए।
कम्पनीका उपाध्यक्ष विजय श्रेष्ठले पर्यटनमन्त्री खड्कराज पौडेललाई उक्त रकम बराबरको चेक हस्तान्तरण गरेका छन्। प्रधानमन्त्री दैवी प्रकोप उद्धार कोषमा गरिएको यो सहयोग कर्मचारीहरूको स्वेच्छिक योगदानबाट जुटाइएको कम्पनीले जनाएको छ।
