यातायात व्यवस्था विभागले सवारी चालक अनुमतिपत्र (लाइसेन्स) छपाइका लागि सुरक्षण मुद्रण केन्द्रसँग सम्झौता गरेको साढे ८ महिनामै २७ लाख लाइसेन्स छापिएको छ। १२ कात्तिकमा भएको सम्झौताअनुसार १२ लाख लाइसेन्स १२ वैशाख ०८३ भित्र छाप्ने लक्ष्य थियो। तर, केन्द्रले लक्ष्यभन्दा बढी नै लाइसेन्स छापेको देखिन्छ।
सम्झौता हुनुअघि लाइसेन्स छाप्ने मेसिन तयार थियो कि थिएन भन्ने प्रश्नमा केन्द्रका कार्यकारी निर्देशक देवराज ढुंगानाले तीन वर्षदेखि थन्किएर बसेको मेसिन मर्मत गरेर मात्र लाइसेन्स छाप्न सहमत भएको बताए। मुद्दामामिलाका कारण संस्था कार्यालय प्रमुखविहीन हुँदा मेसिन सञ्चालन हुन नसकेको उनको भनाइ छ। साथै, प्राविधिक जनशक्तिको अभाव पनि रहेको ढुंगानाले उल्लेख गरे।
मेसिन सञ्चालनका लागि केन्द्रले एचपी इन्डिको सेक्युरिटी प्रेसका प्राविधिकलाई बोलाएर मेसिन बनाउन लगायो। कार्ड डिजाइनको काम भने हंगेरी र अष्ट्रियाबाट आएको प्राविधिक टोलीले गरेको थियो। यो काम असोज ०८२ मै भएको थियो।
नमूना परीक्षण र स्वीकृति
उपलब्ध मेसिन र प्रविधिअनुसार लाइसेन्स छाप्न सकिने/नसकिने भन्ने यकिन गर्न केन्द्रले सुरुमा नमूना लाइसेन्स छापेर परीक्षण गरेको थियो। त्यो नमूना यातायात व्यवस्था विभागलाई पठाइएको थियो। विभागले नमूना लाइसेन्समा सहमति जनाएपछि थप परीक्षणका लागि काठमाडौं विश्वविद्यालयको ल्याबमा कार्डको परीक्षण गरिएको थियो। ढुंगानाका अनुसार परीक्षण सफल भयो र त्यसपछि ठूलो परिमाणमा लाइसेन्स छाप्न सुरु गरिएको हो।
यसरी तीन वर्षदेखि थन्किएको मेसिनलाई प्रयोगमा ल्याएर केन्द्रले साढे ८ महिनामा २७ लाख लाइसेन्स छाप्न सफल भएको छ। यसले विभागको लामो समयदेखिको लाइसेन्स वितरणको समस्या समाधान गर्न सहयोग पुग्ने विश्वास गरिएको छ।
