काठमाडौं उपत्यका ट्राफिक प्रहरी कार्यालयले प्रहरी निरीक्षक (इन्स्पेक्टर) किरण राउतलाई असार महिनाको ‘ट्राफिक पुलिस अफ द मन्थ’ घोषणा गरेको छ । यो सम्मान ट्राफिक व्यवस्थापनमा उत्कृष्ट योगदान पुर्याउने प्रहरी कर्मचारीलाई प्रदान गरिने कार्यालयले जनाएको छ ।
योगदानको कदर
इन्स्पेक्टर राउतले ट्राफिक व्यवस्थापनलाई प्रभावकारी, सेवामुखी र प्रविधिमैत्री बनाउन महत्वपूर्ण भूमिका निर्वाह गरेका छन् । उनले कन्टेन्ट निर्माण, सामाजिक सञ्जाल व्यवस्थापन, सञ्चालन व्यवस्थापन, कार्ययोजना निर्माण तथा कार्यान्वयन, गुनासो व्यवस्थापन र ट्राफिक सचेतना अभिवृद्धिमा उल्लेखनीय योगदान दिएको कार्यालयले बताएको छ ।
सेवाग्राहीप्रति सरल, सभ्य, शिष्ट र उत्तरदायी व्यवहार प्रदर्शन गर्दै सडकमा उत्पन्न हुने विभिन्न ट्राफिक समस्या तथा चुनौतीहरूको समयोचित, समन्वयात्मक र परिणाममुखी ढङ्गबाट समाधान गर्न उनले महत्वपूर्ण योगदान पुर्याएको कार्यालयले जनाएको छ ।
प्रमाणपत्र प्रदान
कार्यालय प्रमुख प्रहरी वरिष्ठ उपरीक्षक (एसएसपी) सुरेशप्रसाद काफ्लेले इन्स्पेक्टर राउतलाई प्रमाणपत्र प्रदान गरेको कार्यालयले जानकारी दिएको छ । यो अवार्डले अन्य ट्राफिक प्रहरीलाई पनि उत्कृष्ट सेवा प्रदान गर्न प्रेरित गर्ने अपेक्षा गरिएको छ ।