विराटनगर, १३ साउन । सुनसरीको देवानगन्ज–३ कप्तानगन्जमा भएको गोलीकाण्डका घाइतेलाई भेट्न आएका दुई मन्त्रीविरुद्ध अस्पताल बाहिर चर्को नाराबाजी भएको छ ।
घाइतेहरूको उपचार भइरहेको न्युरो अस्पताल बिहीबार राति पुगेका गृहमन्त्री सुदन गुरुङ र स्वास्थ्य तथा खाद्य स्वच्छतामन्त्री निशा मेहताविरुद्ध प्रदर्शनकारीले नारा लगाएका हुन् ।
मन्त्रीद्वयको भ्रमण र प्रदर्शन
देवानगन्ज गाउँपालिका–३ कप्तानगन्ज क्षेत्रमा भएको गोलीकाण्डमा परी घाइते भएकाहरूको अवस्था बुझ्न मन्त्रीद्वय विराटनगर आएका थिए । उनीहरू अस्पताल प्रवेश गरेलगत्तै बाहिर जम्मा भएकाहरूले विरोध जनाएको बताइएको छ ।
अस्पताल बाहिर भेला भएका प्रदर्शनकारीले गोलीकाण्डका मृतकलाई सहिद घोषणा गर्नुपर्ने, पीडित परिवारलाई उचित क्षतिपूर्ति दिनुपर्ने र दोषीमाथि कारबाही गर्नुपर्ने माग राखेका छन् ।
पीडितका माग र राजीनामाको आवाज
उनीहरूले घटनाको निष्पक्ष छानबिन गर्नुपर्नेसमेत माग गरेका छन् । प्रदर्शनकारीले गृहमन्त्री गुरुङले नैतिक जिम्मेवारी लिएर राजीनामा दिनुपर्ने आवाजसमेत उठाएका छन् ।
घटनाप्रति स्थानीय आक्रोशित रहेका बेला मन्त्रीद्वयको भ्रमणका क्रममा अस्पताल क्षेत्रमा नाराबाजी चलेको हो ।