काठमाडौं — नेपाल स्की संघको सातौं साधारणसभाले आगामी आर्थिक वर्ष २०८३/८४ का लागि ३४ लाख ८० हजार ८०० रुपैयाँको बजेट पारित गरेको छ। करिब ३५ लाख रुपैयाँको उक्त बजेट राष्ट्रिय तथा अन्तर्राष्ट्रिय प्रतियोगिता, तालिम कार्यक्रम, विविध कार्यक्रममा सहभागिता र विन्टर ओलम्पिकको तयारीमा केन्द्रित रहेको छ।
संघले आगामी वर्ष यी कार्यक्रमलाई नै प्राथमिकतामा राखेर बजेट विनियोजन गरेको जनाएको छ।
साधारणसभाबाट पारित भएका प्रस्ताव
साधारणसभाको बन्द सत्रमा उपाध्यक्ष रमा भट्टराईले प्रस्तुत गरेको कार्ययोजना, महासचिव विजय श्रेष्ठको वार्षिक प्रतिवेदन र कोषाध्यक्ष जितेन्द्र श्रेष्ठले पेस गरेको आर्थिक प्रतिवेदन पारित भएको छ। सभाले बीआर पराजुली एन्ड एसोसिएट्सलाई नयाँ लेखापरीक्षक चयन गरेको छ भने अर्को वर्ष नियमित साधारणसभा आयोजना गर्ने निर्णयसमेत गरेको छ।
बैठकमा संघका पदाधिकारी र सदस्यहरू प्रत्यक्ष तथा भर्चुअल दुवै माध्यमबाट सहभागी भएका थिए। नयाँ विधानमा भौतिक रूपमा उपस्थित हुन नसक्ने सदस्यहरूले भर्चुअल माध्यमबाट साधारणसभामा भाग लिन सक्ने व्यवस्था गरिएको छ।
उद्घाटन समारोह र स्की खेलको सम्भावना
स्वयम्भूस्थित वज्र होटलमा भएको कार्यक्रमको उद्घाटन सत्र उपाध्यक्ष भट्टराईको सभापतित्वमा सम्पन्न भएको थियो। संघका अध्यक्ष जीवनराम श्रेष्ठको प्रमुख आतिथ्यता रहेको थियो। उनी नेपाल ओलम्पिक कमिटीका अध्यक्षसमेत हुन्।
अध्यक्ष श्रेष्ठले खेलकुद क्षेत्रको अस्थिरताका कारण अपेक्षित उपलब्धि हासिल गर्न नसकिएको बताए। देशमा भएको परिवर्तनले खेलकुदमा सकारात्मक दिशामा काम हुने उनले विश्वास व्यक्त गरे। स्की खेलको विकासका लागि संघले निरन्तर प्रयास गरिरहेको र हिमाल प्रशस्त भएको नेपालमा यस खेललाई अगाडि बढाउन सके स्की पर्यटनको गन्तव्य बनाउन सकिने उनको भनाइ थियो।
महासचिव विजय श्रेष्ठले नेपालमा स्की खेल विकास गर्न चुनौती रहे पनि संघले यसको प्रवर्धनमा काम गर्दै आएको बताए।
शुभकामना मन्तव्य र स्नोलाइन विमोचन
सभामा नेपाल रग्बी संघका अध्यक्ष दीपक देवकोटा, ह्यान्डबल संघका अध्यक्ष पिताम्बर तिम्सिना, नेपाल ओलम्पिक कमिटीका उपाध्यक्ष चतुरानन्द राजवैद्य र महासचिव राजीव श्रेष्ठ तथा राष्ट्रिय खेलकुद परिषद्का प्रतिनिधि धन शाहीले शुभकामना मन्तव्य राखेका थिए।
यसै अवसरमा स्की संघले स्की गतिविधि तथा लेखहरू समेटिएको स्नोलाइन म्यागेजिनको पहिलो अंक सार्वजनिक गरेको छ। अध्यक्ष श्रेष्ठसहित अतिथिहरूले उक्त प्रकाशनको अनावरण गरेका थिए।
