विश्वकप २०२६ को चर्चा ताजै रहेका बेला स्पेनिस ला लिगाको नयाँ सिजन शनिबारदेखि सुरु हुँदैछ। यस पटक पनि उपाधिको मुख्य दाबेदारका रूपमा बार्सिलोना र रियल म्याड्रिड नै देखिनेछन् र दुवैबीचको प्रतिस्पर्धाले लिगको आकर्षण झन् बढाउनेछ।
बार्सिलोना लगातार तेस्रो सिजन लिग उपाधि जित्ने अभियानमा छ भने रियल म्याड्रिड आफ्ना पुराना प्रशिक्षक जोसे मोउरिन्होको नेतृत्वमा उसलाई रोक्ने दाउमा छ। दुवै क्लबका नयाँ अनुबन्ध र रणनीतिक तयारीले प्रतिस्पर्धा अझ रोमाञ्चक बनाउने देखिन्छ।
बार्सिलोनाको तेस्रो उपाधि यात्रा
गत सिजन बार्सिलोनाले प्रशिक्षक हान्सी फ्लिकको नेतृत्वमा तीन चरणको खेल बाँकी छँदै लिग उपाधि पक्का गरेको थियो। एल क्लासिकोमा रियललाई २–० ले हराएपछि बार्सिलोनाको उपाधि निश्चित भएको थियो। त्यो लगातार दोस्रो पटक हो र २९ औं पटक क्लब लिग च्याम्पियन बनेको अवसर थियो।
सो सफलताका नायक १८ वर्षीय विन्गर लामिन यामल रहे। उनले १६ गोल गर्नुका साथै ११ गोलमा सहयोग गरे र लिगको उत्कृष्ट खेलाडी चुनिए। चोटका कारण पूरा सिजन खेल्न नपाए पनि उनले लगातार दोस्रो पटक यो अवार्ड आफ्नो नाममा पारेका हुन्।
फ्लिकले बार्सिलोनामा थप दुई वर्ष बस्ने गरी नयाँ सम्झौता गरिसकेका छन्। यामलको प्रदर्शन अझ निखारिँदै गएकोले पनि बार्सिलोना फेरि बलियो दाबेदार मानिएको छ। यदि बार्सिलोनाले लगातार तेस्रो उपाधि जित्यो भने त्यो पेप ग्वार्डिओलाको नेतृत्वमा सन् २००८–२०११ को स्वर्णिम समयकै पुनरावृत्ति हुनेछ।
रियलमा मोउरिन्हो फिर्ता र नयाँ चुनौती
बार्सिलोनाको अभियान रोक्ने जिम्मेवारी जोसे मोउरिन्होलाई दिइएको छ, जो १३ वर्षपछि रियल फर्किएका हुन्। पछिल्ला दुई सिजन कुनै पनि उपाधि जित्न नसकेको रियलले उपाधि बाटोमा फर्किन मोउरिन्होलाई नै भरोसा मानेको छ।
मोउरिन्हो आएसँगै रियल स्थानान्तरण बजारमा पनि सक्रिय देखियो। क्लबले मार्क कुकुरेला, बर्नान्डो सिल्भा, डेन्जेल डुमफ्राइज र इब्राहिम कोनाटेलाई भित्र्याएको छ भने भिनिसियस जुनियरसँग नयाँ सम्झौता गरेको छ। यो ब्राजिली खेलाडी सन् २०३२ सम्म क्लबमै रहने भएका छन्।
अध्यक्ष फ्लोरेन्टिनो पेरेजका लागि ‘गालाकटिकोज’ टिममा अनुशासन कायम राख्नु मुख्य चुनौती हुनेछ। मोउरिन्हो र भिनिसियसबीचको सम्बन्ध पनि उनका लागि चिन्ताको विषय बन्न सक्छ, किनकि गत सिजन मोउरिन्हो बेनफिकाका प्रशिक्षक हुँदा उनीहरूबीच सम्बन्ध चिस्सिएको थियो।
रियलको प्रशिक्षकका रूपमा मोउरिन्होको अन्तिम सिजन क्लबले उपाधि जितेको थियो, तर अहिले उनको उपाधि जित्ने क्षमतामाथि प्रश्न उठ्ने देखिन्छ। उनी आधुनिक फुटबलका नयाँ रणनीतिका अगाडि पुराना साबित भइसकेका छन् भने उनको प्रशिक्षण करियर ओरालो लागेको छ। यस्तोमा बार्सिलोनाले मोउरिन्होलाई फेरि असफल बनाउँदै उपाधि जित्नुको अर्थ अझै बढी हुनेछ।
