सर्लाही प्रहरीले उच्च ध्वनिमा डीजे बजाएको आरोपमा दुई व्यक्तिलाई पक्राउ गरी डीजे साउन्ड प्रणाली जडान गरिएको सवारीसाधनसमेत बरामद गरेको छ।
जिल्ला प्रहरी कार्यालय सर्लाहीका अनुसार मन्त्रिपरिषद्, जिल्ला प्रशासन कार्यालय र जिल्ला सुरक्षा समितिले गरेको व्यवस्थाविपरीत ठूलो आवाजमा डीजे सञ्चालन भइरहेको सूचनाका आधारमा कारबाही अघि बढाइएको हो। उच्च ध्वनिमा डीजे बजाइएको भन्ने जानकारी प्रहरीले प्राप्त गरेपछि टोली खटिएको थियो।
प्रहरीले मलंगवा नगरपालिका–९ को गोरखकालीबाट बा १५ च ४२९१ नम्बरको सवारीसाधनसहित विभिन्न साउन्ड सिस्टमका उपकरणहरू बरामद गरेको छ।
दुई जना पक्राउ, थप अनुसन्धान जारी
पक्राउ पर्नेहरूमा डीजे सञ्चालक हरिपुर नगरपालिका–७ का ५५ वर्षीय जोगेश्वर पण्डित र सोही सवारीसाधनका चालक बगमती नगरपालिका–४ का २३ वर्षीय जगन्नाथ साह छन्।
जिल्ला प्रहरी कार्यालयका प्रवक्ता डीएसपी वेदप्रसाद गौतमले सवारीसाधन, डीजे उपकरण र दुवै जनालाई थप अनुसन्धानका लागि नियन्त्रणमा लिएको बताए।
नागरिकको स्वास्थ्य र ध्वनि प्रदूषणप्रति सचेत रहन आग्रह
प्रहरीले जनस्वास्थ्यमा प्रतिकूल असर पार्न सक्ने वा ध्वनि प्रदूषण निम्त्याउने खालको डीजे आवाज नचलाउन आग्रह गरेको छ। यस्तो गरेको पाइएमा कानुनले निर्धारण गरेका उपाय अपनाएर कारबाही गरिने प्रहरीको चेतावनी छ।
