विद्यालय तहदेखि क्लाइम्बिङ खेललाई व्यवस्थित रूपमा अगाडि बढाउने गरी दुई खेल संस्थाहरूबीच सहकार्य सम्झौता भएको छ। नेपाल विद्यालय खेलकुद महासंघ (एनएसएसएफ) र नेपाल क्लाइम्बिङ स्पोर्ट एसोसिएसन (एनसीएसए) ले विद्यालयस्तरमा क्लाइम्बिङ खेलको प्रवर्द्धन, विकास र विस्तार गर्ने उद्देश्यमा हस्ताक्षर गरेका हुन्।
बुधबार आयोजित एक कार्यक्रममा एनएसएसएफका अध्यक्ष विनोद श्रेष्ठ र एनसीएसएका अध्यक्ष रमेशकुमार पौडेलले सम्झौतापत्रमा हस्ताक्षर गरेका छन्।
सम्झौताअनुसार विद्यालय तहमा क्लाइम्बिङ खेललाई फैलाउँदै एनएसएसएफ र अन्तर्राष्ट्रिय स्कुल स्पोर्ट फेडेरेसन (आईएसएफ) अन्तर्गतका प्रतियोगितामा नेपाली खेलाडीको सहभागिता थप प्रभावकारी बनाउने लक्ष्य राखिएको छ।
सम्झौताबारे एनएसएसएफका अध्यक्ष श्रेष्ठले यो केवल औपचारिक हस्ताक्षर नभई विद्यालय तहदेखि क्लाइम्बिङलाई व्यवस्थित रूपमा विकास गर्ने महत्त्वपूर्ण सुरुवात भएको बताए। उनले यसले नेपालको साहसिक खेल र पर्यटन प्रवर्द्धनमा समेत योगदान पुग्ने विश्वास व्यक्त गरे।
नेपाल क्लाइम्बिङ स्पोर्ट एसोसिएसनका अध्यक्ष पौडेलले नेपालमा क्लाइम्बिङको प्रशस्त सम्भावना रहेको उल्लेख गर्दै विद्यालयस्तरबाटै खेलाडी उत्पादन गर्न एनएसएसएफसँगको सहकार्य महत्त्वपूर्ण हुने धारणा राखे।
एनएसएसएफका महासचिव राजकुमार कार्कीले ग्रासरुट तहमा सञ्चालित क्लाइम्बिङ गतिविधिको पहिचान गरी भावी राष्ट्रिय तथा अन्तर्राष्ट्रिय खेलाडी उत्पादनमा यो सहकार्यले टेवा पुर्याउने विश्वास व्यक्त गरे।
