ललितपुरको धोबीघाटमा सडक किनारमा रोकिराखेको एउटा ट्रकमा मोटरसाइकल ठोक्किँदा एक जना युवाको मृत्यु भएको छ भने अर्का एक जना घाइते भएका छन्। दुर्घटनामा परेर ज्यान गुमाउनेमा मोटरसाइकल चालक धादिङको धुनिबेसी घर भएका २० वर्षीय रितेश श्रेष्ठ रहेका छन्।
उपचारका क्रममा अस्पतालमा निधन
प्रहरीका अनुसार हिजो बेलुकी करिब ८ बजे धोबीघाट सडक खण्डमा बा ७५ प ८७० नम्बरको मोटरसाइकल बिग्रिएर सडक छेउमा रोकिराखेको बागमती प्रदेश ०३–००१ ख २०१५ नम्बरको ट्रकको पछाडि ठोक्किएको थियो। दुर्घटनामा परेर गम्भीर घाइते भएका चालक श्रेष्ठलाई तत्काल उपचारका लागि ललितपुरस्थित मेडिसिटी अस्पताल लगिएको थियो। अस्पतालमा उपचारकै क्रममा उनको मृत्यु भएको प्रहरीले जनाएको छ।
दुर्घटनामा मोटरसाइकलको पछाडि सवार धादिङकै सातघुम्ती बस्ने २० वर्षीय समीर भुजेल घाइते भएका छन्। उनको अहिले सोही अस्पतालमा उपचार भइरहेको छ।
ट्रक चालक नियन्त्रणमा
दुर्घटनामा संलग्न ट्रक र त्यसका चालकलाई प्रहरीले नियन्त्रणमा लिएको छ। प्रहरी प्रभाग सानेपाले ट्रक चालकलाई नियन्त्रणमा लिएर घटनाका सम्बन्धमा आवश्यक अनुसन्धान गरिरहेको जानकारी दिएको छ।