अर्जेन्टिनाका कप्तान लियोनल मेसी फिफा विश्वकप २०२६ को गोल्डेन बुट होडमा अग्र स्थानमा उक्लेका छन्। सेमिफाइनलमा इंग्ल्यान्डविरुद्ध दुई असिस्ट गरेपछि उनले फ्रान्सका किलियन एमबाप्पेलाई पछि पार्दै सर्वाधिक गोलकर्ताको सूचीमा अगाडि बढेका हुन्।
अमेरिकाको एटलान्टा स्टेडियममा बिहीबार बिहान भएको दोस्रो सेमिफाइनलमा अर्जेन्टिनाले इंग्ल्यान्डविरुद्ध २-१ को पुनरागमन जित हात पार्दा मेसीले दुवै गोलमा असिस्ट गरेका थिए। यस जितसँगै अर्जेन्टिना लगातार दोस्रो पटक विश्वकप फाइनलमा प्रवेश गरेको छ।
गोल्डेन बुट होड
मेसी र एमबाप्पे दुवैले ७ खेल खेल्दै समान ८ गोल गरेका छन्। तर मेसीको असिस्ट ४ पुग्दा एमबाप्पेको ३ मात्र छ। एमबाप्पेको कप्तानीमा रहेको फ्रान्स सेमिफाइनलमा स्पेनसँग पराजित हुँदै विश्वकपबाट बाहिरिसकेको छ। अब एमबाप्पेको फ्रान्सले तेस्रो स्थानको लागि इंग्ल्यान्डसँग खेल्नेछ। एक खेल बाँकी रहेकाले एमबाप्पेको गोल्डेन बुटको सम्भावना भने कायमै छ।
यस्तै ७ गोल गर्दै तेस्रो स्थानमा रहेका नर्वेका एर्लिङ हालान्ड पनि विश्वकपबाट बाहिरिसकेका छन्। इंग्ल्यान्डका कप्तान ह्यारी केन र जुड बेलिङघमले समान ६ गोल गरेका थिए तर सेमिफाइनलमा पराजित भएपछि उनीहरूको दाबेदारी समाप्त भएको छ। फ्रान्सका उसमान डेम्बेले (५ गोल) पनि होडबाट बाहिरिएका छन्।
फाइनल पुगेको स्पेनका मिकेल ओजाबायाल ५ गोलका साथ सातौं स्थानमा छन्। उनले फाइनलमा ५ गोल गरेमात्र मेसीलाई पार गर्न सक्नेछन्। अन्यथा मेसीको सर्वाधिक गोलकर्ता बन्ने सम्भावना प्रबल छ। यदि मेसीले यो अवार्ड जितेमा यो उनको पहिलो गोल्डेन बुट हुनेछ।
मेसीका कीर्तिमान
३९ वर्षको उमेरमा पनि उस्तै जोश र लयका साथ खेलिरहेका मेसीले यस विश्वकपमा थुप्रै कीर्तिमान बनाएका छन्। उनले विश्वकपमा लगातार ९ खेलमा गोल गर्ने र नकआउट चरणमा लगातार ६ खेलमा गोल गर्ने कीर्तिमान कायम गरेका छन्। यस्तै, उनले विश्वकपमा सर्वाधिक ३३ खेल खेलेका छन् भने २१ गोल र ११ असिस्ट गर्दै तीनै विधामा नयाँ कीर्तिमान बनाएका छन्।
यसअघि सन् २०१४ र २०२२ मा गोल्डेन बल अवार्ड जितिसकेका मेसी दुई पटक यो अवार्ड जित्ने पहिलो र एक मात्र खेलाडी हुन्। अब अर्जेन्टिनालाई लगातार दोस्रो पटक उपाधि जिताउने लक्ष्यमा मेसी फाइनलमा उत्रनेछन्।
