काठमाडौं। जिल्ला अदालत काठमाडौंले व्यवसायीहरू दीपक भट्ट र सुलभ अग्रवाललाई तीन फरक मुद्दामा धरौटीमा रिहा गर्न आदेश दिएको छ। न्यायाधीश शिवप्रसाद आचार्यको इजलासले बीमा ऐन र धितोपत्र सम्बन्धी ऐन अन्तर्गतका मुद्दामा धरौटीको सर्त तोकेको हो।
बीमा ऐन अन्तर्गतको मुद्दामा अग्रवाललाई दुई करोड रुपैयाँ र भट्टलाई एक करोड ५० लाख रुपैयाँ धरौटी तोकिएको छ। धितोपत्र सम्बन्धी अर्को मुद्दामा अग्रवालबाट दुई करोड ३० लाख रुपैयाँ धरौटी माग गरिएको छ। धितोपत्र सम्बन्धी तेस्रो मुद्दामा भने अग्रवालको एक करोड ५० लाख र भट्टको एक करोड रुपैयाँ धरौटी तोकिएको अदालतले जनाएको छ।
यद्यपि, यी दुवै व्यवसायी सम्पत्ति शुद्धीकरण सम्बन्धी कसुरमा विशेष अदालतको आदेशले थुनामा छन्। विशेष अदालतले उनीहरूलाई सो मुद्दामा पुर्पक्षका लागि थुनामा पठाएको हो। जिल्ला अदालतले अन्य मुद्दामा धरौटीमा छाड्न आदेश दिए पनि सम्पत्ति शुद्धीकरणको मुद्दामा थुनामा रहेकाले उनीहरू तत्काल रिहा हुने अवस्था छैन। धरौटी बुझाएपछि पनि उनीहरू थुनामुक्त हुन पाउने छैनन्।
