जेनेभा — विश्व मौसम विज्ञान संगठनले आगामी अगस्टदेखि अक्टोबरसम्मको अवधिमा एल निनोको प्रभाव विश्वव्यापी जलवायु प्रणालीमा प्रमुख रूपमा देखिने प्रक्षेपण गरेको छ। संगठनका अनुसार त्यस अवधिमा विश्वका धेरै भूभागको तापक्रम सामान्यभन्दा माथि जाने सम्भावना छ भने वर्षाको ढाँचामा पनि स्पष्ट फेरबदल आउन सक्छ।
मौसम प्रणालीमा देखिने प्रभाव
इन्डियन ओसन डाइपोलको धनात्मक अवस्थाको सम्भावना र महासागरहरूको बढ्दो तापक्रमका कारण आउँदा महिनाहरूमा विश्वका कयौं क्षेत्रको मौसममा परिवर्तन देखिने संकेत छ। विश्व मौसम विज्ञान संगठनको ‘ग्लोबल सिजनल क्लाइमेट अपडेट’ ले एल निनो यस अवधिमा बलियो मौसमी घटनाको रूपमा विकसित हुने जनाएको छ।
बहु-मोडेल पूर्वानुमानअनुसार मध्य प्रशान्त महासागरको सतहको तापक्रम सामान्यभन्दा २.९ डिग्री सेल्सियसभन्दा बढी हुन सक्ने प्रक्षेपण छ। न्यानो सतहको यस्तो अवस्थाले एल निनोको तीव्रता स्पष्ट पार्ने अनुमान गरिएको छ।
क्षेत्रीय असर र जोखिम
पश्चिम हिन्द महासागरमा औसतभन्दा बढी र पूर्वी हिन्द महासागरमा औसतभन्दा कम तापक्रम रहने जलवायु ढाँचालाई धनात्मक इन्डियन ओसन डाइपोल भनिन्छ। यसको पनि पूर्वानुमान गरिएको छ र दुवै महासागरीय प्रणालीको संयुक्त प्रभावले हिन्द महासागर वरपरका क्षेत्रमा खडेरी, बाढी तथा डढेलोको जोखिम बढाउन सक्ने चेतावनी दिइएको छ।
यी प्रभावहरूका कारण विशेष गरी हिन्द महासागर नजिकका भूभागमा क्षेत्रीय जलवायु परिवर्तनका असर अझ गहिरिन सक्ने बताइएको छ।
गुटेरेसको चेतावनी
संयुक्त राष्ट्रसंघका महासचिव एन्टेनियो गुटेरेसले एल निनोले पहिल्यै तातिइरहेको पृथ्वीलाई अझ तातो बनाउने काम गरिरहेको टिप्पणी गरेका थिए। उनले एल निनो ढोकामा मात्रै नआई घरभित्रै छिरेर ताप बढाइरहेको र यसलाई सुरुवात मात्र भनेर बुझ्नुपर्ने बताएका थिए।
भीषण तापलहरू, विनाशकारी डढेलो र महासागरको कीर्तिमानी तातोपनका कारण थप जोखिम उत्पन्न हुन सक्ने उनले चेतावनी दिएका थिए।
